Tommasi-fjölskyldan á Ítalíu hefur búið til vín í 120 ár og farist það vel úr hendi. Giacomo Tommasi keypti sínar fyrstu vínekrur í Valpolicella og þar hefur hjarta Tommasi-fjölskyldunnar verið æ síðan. Vínhúsið hefur þó vaxið og dafnað og á nú vínekrur sem ná yfir tæpa 600 hektara og eru í Valpolicella, Lombardy, Toscana, Umbria, Manduria, Basilicata og á Sikiley. Úrval vína er talsvert og á heimasíðu Tommasi má finna 54 mismunandi vín frá áðurnefndum svæðum. Í hillum vínbúðanna er að finna 18 mismunandi vín í hefðbundinni flöskustærð frá Tommasi (rauð, hvít, rósa og freyðandi), auk hálfflaska með grappa og sætvíni og svo 5 kassavín. Unnendur Tommasi-vína hafa því úr nógu að velja í vínbúðunum.
Vín dagsins
Vín dagsins er rósavín, gert úr þrúgunum Turbiana (90%) og Rondinella (10%) sem koma af vínekrum í nágrenni Garda-vatns á Ítalíu. Þrúgurnar eru kramdar (hvor tegund fyrir sig) og safinn látinn liggja í rúma klukkustund með hýðinu. Þá voru þær pressaðar varlega (til fá ekki of mikinn lit í safann) og að því loknu var þeim blandað saman. Safinn var gerjaður við lágt hitastig (15-18°C) í stáltönkum, og vínið fékk svo að liggja í 4 mánuði í tönkunum fyrir átöppun.
Tommasi Le Fornaci Rosé 2021 er fölbleikt á lit, með angan suðrænum ávöxtum á borð við mangó og ananas, ásamt bleiku greipaldin, klementínuberki, ferskjum, rósum og steinefnum. Í munni er vínið þurrt, með ríflega miðlungssýru og létta fyllingu. Í frísklegu eftirbragðinu eru mangó, ananas, bleik greipaldin, klementínubörkur, ferskjur og steinefni. 88 stig . Góð kaup (2.999 kr). Njótið með fiskréttum, ljósu fuglakjöti, grænmetisréttum og pizzum, eða eitt og sér.
Notendur Vivino gefa þessu víni 4,1 stjörnu (107 umsagnir þegar þetta er skrifað).
