Á þessum tíma árs fer ég venjulega að huga að ársuppgjöri Vínsíðunnar og átta mig á því að það er fjöldi umsagna sem ég á eftir að setja inn á síðuna. Lesendur Vínsíðunnar hafa eflaust tekið eftir því hversu rólegt hefur verið á síðunni frá í sumar. Ég hef þó ekki setið auðum höndum og náð að smakka fjölda áhugaverðra vína. Þá er ég líka byrjaður í WSET-3 námi sem lýkur í mars og því nóg að gera við að fræðast um vín og smakka. Ég ætla að reyna að koma inn sem flestum óbirtum umsögnum inn á Vínsíðuna fyrir áramót en þori ekki að lofa að þær birtist allar (sýnist að þær séu um 100…). Það er því viðbúið að margar þeirra verði í styttri kantinum og upplýsingarnar sem hafa fylgt umfjöllunum verða ekki jafn ítarlegar og áður.
Það er eiginlega synd að hefja þessa hraðferð á víni frá La Rioja Alta, sem er eitt af betri (og stærri) vínhúsum Rioja. Ársframleiðslan nálgast 1,5 milljónir flaskna á hverju ári, en það er þó enginn afsláttur gefinn á gæðum. Vínhúsið hefur eignast önnur vínhús á svæðinu og m.a. notað þau til að þróa víngerðina á meðan flaggskipin halda upprunalegum stíl.
La Rioja Alta Viña Arana Gran Reserva 2014 er nútímalegt Rioja í fullum gæðum. Það er kirsuberjarautt á lit, með góða dýpt og miðlungs þroska. Í nefinu finnur maður einkum vanillu, lakkrís, rauð kirsuber, sólber, súkkulaði og eik. Miðlungstannín sem eru farin að mýkjast, miðlungs sýra og góður skrokkur. Kirsuber, balsam, súkkulaði og vanilla ráðandi í þéttu og góðu bragðinu, ásamt tókbaki og eik. Ljómandi gott vín sem fer vel með spænskum mat – pylsur, grillað svínakjöt og nautakjöt. 92 stig. Góð kaup (5.999 kr). Í dag er 2015-árgangurinn í hillum vínbúðanna sem mun vera enn betri en þessi sem hér um ræðir og full ástæða til að prófa það. Þorri Hringsson í Víngarðinum gefur þeim árgangi 5 stjörnur.
Robert Parker gefur þessu víni 90 stig og notendur Vivino gefa því að meðaltali 4,3 stjörnur (2.178 umsagnir þegar þetta er skrifað).
