Vínhús La Chablisienne var stofnað árið 1923, þegar vínbændur í Chablis stofnuðu samvinnufélag til að hjálpast að í gegnum þær efnahagsþrengingar sem þá áttu sér stað. Í fyrstu sáu vínbændurnir sjálfir um að gera sín vín en La Chablisienne sá um að blanda vínin og dreifa þeim áfram til heildsala. Á sjötta áratug síðustu aldar fór La Chablisienne að taka við ógerjuðum safanum og annast allt víngerðarferlið, og þannig er það enn í dag.
La Chablisienne er eitt stærsta vínhúsið í Chablis og framleiðir 27 mismunandi vín (öll hvít, að sjálfsögðu) – þar af eru 13 premier cru og 6 grand cru. Vínin frá La Chablisienne eru alls um fjórðungur af allri framleiðslunni í Chablis.
Vín dagsins
Vín dagsins er að sjálfsögðu hreint Chardonnay sem er látið gerjast í stáltönkum. Að lokinni gerjun er vínið látið liggja áfram í stáltönkunum í 6 mánuði.
La Chablisienne Chablis La Sereine 2017 er fölgullið á lit, með miðlungsdýpt og unglegt að sjá. Í nefinu finnur maður grösugan ilm af sítrónum og steinefnum. Í munni er góð sýra og fínn ávöxtur. Greipaldin, perur, appelsínubörkur, hundasúrur og steinefni í örlítið smjörkenndu eftirbragðinu. 88 stig. Góð kaup (3.399 kr). Fer vel með skelfiski, fiskréttum, ljósu fuglakjöti og hvítmygluostum. Vínið ætti að njóta sín vel næstu 4-5 árin.
Vivino 3,7 (661 umsögn þegar þetta er skrifað). Ekki verið dæmt í Wine Spectator í nokkur ár en síðustu árgangar (2012 og 2013) fengu 89 stig. Robert Parker gefur þessum árgangi 89 stig.
