Þegar rætt er um vín frá Toscana dettur flestum líklega í hug Chianti og Chianti Classico, enda líklega þekktustu vínhéruð Toscana. En bestu Toscana-vínin koma þó líklega frá vínekrunum í kringum þorpið Montalcino. Nafnið vísar til þess að þrúgan sem notuð er í víngerðina var kölluð Brunello. Síðar kom þó í ljós að sú þrúga er í raun Sangiovese-þrúgan, sem er aðalþrúgan í Toscana.
Víngerð í Montalcino á sér auðvitað langa og merka sögu, líkt og önnur víngerð í Toscana. Þegar í ljós kom að þrúgan Brunello var í raun Sangiovese fór vínhúsin smátt og smátt að kenna vín sín við þorpið Montalcino, og nafnið Brunello festist einnig við þau. Þegar víngerð á Ítalíu fór að þróast meira og vínhús fóru að víkja frá gömlu hefðunum, m.a. með notkun þrúga sem ekki höfðu verið mikið ræktaðar á Ítalíu og tilkomu annarra nýjunga og nýrra vína á borð við ofur-Toscanavínin, jókst þörfin á að skerpa nánar á reglunum um ítalska víngerð. Ofur-Toscanavínin urðu ekki lengur borðvín eða vino di tavola heldur Indicazione geografica tipica (IGT) og einnig var tekin upp ný skilgreining – Denominazione di origine controllata e garantita (DOCG) – sem er hæsta gæðastig ítalskrar víngerðar með ströngustu reglurnar. Í upphafi voru aðeins Barolo, Vino Nobile di Montepulciano og Brunello di Montalcino sem féllu undir DOCG, en fljótlega bættist Barbaresco í þann hóp.
Áhugasamir geta lesið þessa grein og þessa grein á Wikipedia.
Vín dagsins
Vínhús Il Poggione hefur framleitt Brunello di Montalcino frá upphafi 20. aldar og vín þeirra þykja jafnan í hópi þeirra bestu frá Montalcino. Vín dagsins hefur ratað inn á topp 100-lista Wine Spectator og til að mynda lenti 2010-árgangurinn í 4. sæti árið 2015 og Rosso di Montalcino („ódýra“ vínið þeirra) komst inn á listann fyrir 3 árum með 2015-árganginn.
Il Poggione Brunello di Montalcino 2014 er hreint Sangiovese sem fékk að liggja í 30 mánuði á frönskum eikartunnum fyrir átöppun á flöskur. Vínið er rúbínrautt á lit, unglegt og með góða dýpt. Í nefinu finnur maður kirsuber, plómur, tóbak, ögn af kakó og smá rósir. Í munni er gnægð af tannínum, góð sýra og flottur ávöxtur. Kirsuber, plómur, tóbak og kakó í löngu en silkimjúku eftirbragðinu. Frábært vín sem eflaust á eftir að batna enn frekar á næsta áratug. 95 stig. Mjög góð kaup (7.290 krónur). Drekkið með góðum steikum – naut, villibráð – eða þroskuðum ostum.
Robert Parker gefur þessu víni 94 stig. Wine Spectator gefur því 92 stig og notendur Vivino gefa 4.2 stjörnur (1.546 umsagnir þegar þetta er skrifað).
