Vínhús CUNE rekur sögu sína til ársins 1879, stofnað af bræðrunum Eusebio og Raimundo Real de Asúa. Fullu nafni heitir vínhúsið Compañía Vinícola del Norte del España eða Norður-spænska vínfélagið, skammstafað CVNE. Strax á fyrsta árganginum sem vínhúsið sendi frá sér var stafsetningarvilla á flöskumiðanum þar sem stóð CUNE í stað CVNE. Þar sem vínið fékk mjög góðar viðtökur ákváðu bræðurnir að halda þessari skammstöfun óbreyttri og þess vegna stendur enn CUNE á flöskumiðanum í dag. Vefsíðan þeirra er hins vegar á www.cvne.es og þar er farið ítarlegar yfir sögu vínhússins.
Vínin frá CVNE hafa hlotið fjölda viðurkenninga og árið 2013 var vín þeirra Imperial Gran Reserva 2004 valið vín ársins hjá Wine Spectator. Í vínbúðunum er hægt að fá 6 mismunandi rauðvín frá CUNE, þar á meðal Imperial Gran Reserva (reyndar 2012 árgangur sem í hillunum núna) og 1 hvítvín. Þessi vín hafa yfirleitt verið nokkuð örugg kaup og fallið vel í kramið hjá íslenskum vínunnendum.
Vín dagsins
Vín dagsins er auðvitað frá CUNE, Reserva árgangur 2015. Vínið er 85% Tempranillo og hin 15% koma af þrúgunum Garnacha Tinta, Graciano og Mazuelo. Að lokinni gerjun fékk vínið að liggja í 18 mánuði á 225 lítra tunnum úr franskri og amerískri eik. Að lokinni átöppun á flöskur fékk vínið svo að hvíla í 18 mánuði áður en það var sett á markað.
CUNE Rioja Reserva 2015 er rúbínrautt á lit, unglegt með miðlungsdýpt. Í nefinu finnur maður nokkuð klassískan ilm af rauðum berjum, lakkrís, vanillu, pipar og eik. Í munni eru miðlungstannín, ágæt sýra og fínn ávöxtur. Góður ávöxtur í eftirbragðinu, lakkrís og skógarber og smá krydd. Fer vel með hvers konar grillkjöti, pottréttum og ostum. Góð kaup (2.999 kr). 90 stig.
Notendur Vivino.com gefa þessum árangi 3.8 í einkunn (2.927 umsagnir þegar þetta er skrifað). Robert Parker og Wine Spectator gefa 90 stig. James Suckling gefur 93 stig og Wine Enthusiast gefur 92 stig.
