Fyrir skömmu fjallaði ég um alveg prýðlegt Syrah frá vínhúsi Vegalfaro og nú er komið að hvítvíni frá sama vínhúsi. Vínhús Vegalfaro er staðsett í Utiel-Requena í nágrenni Valencia. Chardonnay er ekki fyrsta þrúgan sem kemur upp í hugann þegar spænsk hvítvín eru annars vegar, en auðvitað getur maður samt búist við því að hún sé ræktuð þar líkt og í flestum öðrum vínræktarsvæðum heimsins. Engu að síður þá fer ekki jafn mikið fyrir hvítvínum í spænskri víngerð, séu þau borin saman við rauðvínin, og á Pago-vínekrunum fer auðvitað mesta plássið undir rauðar þrúgur.
Vín dagsins
Vínviðurinn sem gefur af sér þrúgurnar í þetta vín er um 30 ára gamall og liggur í 780 metra hæð yfir sjávarmáli. Víngerðarferlið sjálft er allt lífrænt og að lokinni gerjun er vínið látið liggja í litlum (225 lítra) tunnum úr franskri eik, það sem 2/3 þeirra eru nýjar en 1/3 hefur verið notaður áður. Eftir átöppun á flöskur fær vínið svo að bíða í minnst 6 mánuði áður en það fer í sölu.
Pago de Los Balagueses Chardonnay 2017 er strágullið á lit og fallegt í glasi. Í nefinu finnur maður angan af sítrus, eplum, perum, ananas og frönsku eikinni ásamt ögn af steinefnum. Í munni er fín sýra og góður ávöxtur. Vínið er þurrt með góða fyllingu og þægilegt eftirbragð þar sem epli, perur, ananas, smjör og steinefni ráða ferðinni. Ákaflega matarvænt vín – hafið með ljósu fuglakjöti, skelfiski, feitum fiski eða bara eitt og sér! 90 stig, mjög góð kaup (3.590 kr). Kannski jólavínið fyrir þá sem vilja hvítvín með matnum?
