Þrúgan Viura er mjög mikilvæg í spænskri víngerð, þar sem hún er uppistaðan í hvítvínum frá Rioja og Katalóníu. Í Katalóníu gengur hún undir nafninu Macabeu og þar er hún einnig notuð við gerð Cava-vínanna, ásamt Xarel-lo og Parellada. Þrúgan er líka ræktuð í Languedoc í Frakklandi þar sem hún er notuð í hvítvínsgerð.
Viura gefur af sér þurr vín með góða fyllingu og fína sýru, og þau geta þolað allt að 10-15 ára geymslu, séu vínin vel gerð. Almennt má greina hunangsmelónur, límónur og stundum heslihnetur í þessum vínum.
Vín dagsins
Vín dagsins kemur frá vínhúsi Artadi, sem ég hef áður fjallað um. Það er gert úr 100% Viura sem hefur að lokinni gerjun verið látið þroskast í 2 ár og 9 mánuði í stáltönkum. Aðeins voru framleiddir um 1000 kassar af víninu.
Artadi Vinas de Gain Vineyard Selection Blanco 2015 er strágult á lit, unglegt með góða dýpt. Í nefinu finnur maður hunangsmelónur, límónubörk, perur og ögn af vanillu. Í munni er snörp sýra, fínn ávöxtur og góð fylling. Hunangsmelónan og límónubörkurinn ráða ferðinni í góðu eftirbragðinu. Fer vel með austurlenskum mat og ljósu fuglakjöti. 89 stig. Ætti að endast vel í nokkur ár til viðbótar. 3.990 kr.
Wine Spectator gefur þessu víni 90 stig.
