Gott villibráðarvín

Þó að mörg að stærstu og þekktustu rauðvínum heimsins komi frá Bordeaux, þá er Pessac-Leognan ekki fyrsta svæðið sem kemur upp í hugann, heldur tengjum við frekar við svæðin í Medoc á vinstri bakka Gironde-árinnar og Pomerol á hægri bakkanum.  Árið 1855 voru frönsku vínhúsin flokkuð í gæðaflokka og átti sú flokkun eftir að hafa heilmikil áhrif í franska vínheiminum.  Á þennan lista komst aðeins eitt vín frá Pessac-Leognan – Chateau Haut-Brion sem var eitt af 4 vínhúsum í efsta flokki.  Vínhúsið sem framleiðir vín dagsins komst ekki á þennan lista frekar en önnur vínhús frá Pessac-Leognan (að H-B undanskildu), en árið 1953 voru vínhúsin í Pessac-Leognan einnig flokkuð samkvæmt gæðastaðli og fengu vínhúsin sem uppfyllt gæðakröfurnar að merkja vín sín með áletruninni Gran Cru Classé de Graves.  Vínin frá Pessac-Leognan eru að jafnaði um 65% Cabernet Sauvignon og 30% Merlot, en einnig getur verið lítilræði af Cabernet Franc og Petit Verdot í rauðvínunum. Hvítvínin af þessu svæði er að mestu leyti úr Sauvignon Blanc (70%) og Semillon (30%).
Domaine de Chevalier Pessac-Leognan 2012 er kirsuberjarautt á lit, unglegt en með góða dýpt. Í nefinu sólber, útihús, leður, pipar, frönsk eik og krydd.  Í munni mjúk tannín, fín sýra, góður ávöxtur. Sólber , plómur, súkkulaði og tóbak í góðu eftirbragðinu, heldur sér vel og lengi. Frábært vín en tekur vel í veskið (12.151 kr) Fyrir þá sem ætla að gera virkilega vel við sig um áramótin og fá sér hreindýralundir, krónhjört eða nautalund Wellington. 93 stig.