Eitt gott frá Alsace

Vínin frá vínhúsi Willm í Alsace-héraði í Frakklandi hafa verið í nokkru uppáhaldi hjá mér í seinni tíð og ekki að ástæðulausu – hvítvínin þeirra hafa m.a. fengið Gyllta glasið undanfarin 3 ár (ýmist Riesling, Pinot Gris eða Gewurztraminer) og virðast nánast vera orðnir áskrifendur að þessari viðurkenningu, enda vel að henni komin.  Einhverra hluta vegna virðast þau ekki falla jafn vel í kramið hjá Allison Napjus sem er aðalsérfræðingur Wine Spectator í vínunum frá Alsace.  Það gerir svo sem ekki mikið til á meðan okkur hinum líkar þessi vín…
Vín dagsins er hvítvín eins og nær öll vínin frá Willm (þeir framleiða líka rósavín og Cremant-freyðivín) og öðrum framleiðendum í Alsace-héraði, og þetta vín er gert úr þrúgunni Pinot Gris (sem heitir líka Pinot Grigio á Ítalíu).  Kollegi minn Steingrímur Sigurgeirsson á vinotek.is er sammála mér um ágæti þessara vína og gefur þessu tiltekna víni fjóra og hálfa stjörnu.
Willm Pinot Gris Alsace Reserve 2015 er fölgult á lit og unglegt að sjá.  Í nefinu finnur maður sætar perur, hunang, timjan og mikinn sítrusávöxt, sem er svo meira áberandi í munni, þar sem maður finnur einnig hunangið og smávegis af franskri eik, meira að segja smá anís.  Góð fylling og flott jafnvægi.  Mjög góð kaup (2.499 kr). 89 stig.