Andreza hvítt

Ég hef áður fjallað um rauðvín frá hinum portúgalska Andreza og nú er komið að hvítvíni.  Víngerð þessi er staðsett í Douro-héraði í Portúgal, sem er eitt aðal vínhérað Portúgals.  Þetta vín er gert úr þrúgunni Codega, sem er algeng þrúga í Portúgal (þó ekki víða annars staðar), og gengur það einnig undir nöfnunum Roupeiro og Alva.  Portúgölsk víngerð hefur tekið miklum framförum undanfarinn áratug og það á einnig við um hvítvínin þeirra.
Andreza Codega Do Larinho 2015 er strágult á lit, með frísklega angan af suðrænum ávöxtum og sítrus.  Í munni finnur maður greipaldin og eik, og það vottar aðeins fyrir beiskju í eftirbragðinu sem annars heldur sér nokkuð vel.  Prýðilegt vín fyrir fisk og ljóst fuglakjöt. 88 stig (Robert Parker gefur þessu víni reyndar 90 stig!). Mjög góð kaup (2.000 kr)