Tryggðarvín

Víngerðin Viña Maipo í Chile rekur sögu sína aftur til árins 1948, en eftir að hún komst í eigu risans Concha y Toro 20 árum síðar fór víngerðin að ná nýjum hæðum og framleiðir í dag gæðavín á góðu verði.  Það er þó einkum á síðastliðnum áratug að vínin hafa náð þessum stöðugleika sem við leitum eftir, en það á reyndar við um mörg önnur vín frá Chile og Argentínu undanfarin ár.
Línan Gran Devocion byggir á Syrah-þrúgunni, sem er þó í minnihluta í rauðvínunum.  Í línunni eru Cabernet Sauvignon, Petite Syrah og Carmenere, en aðeins sú síðastnefnda er fáanleg hér á landi.
Vina Maipo Gran Devocion Carmenere Syrah 2010 er dökkkirsuberjarautt, unglegt með fína tauma.  Í nefinu eru kirsuber, mynta, pipar, leður og anís.  Í munni eru mikil tannín, góð sýra, eik, anís, lakkrís, tóbak og krydd.  Gott eftirbragð sem heldur sér nokkuð vel.  Mjög góð kaup (2.599 kr).  89 stig.