Frábær malbec sem þið verðið að prófa!

Sú þrúga sem nýtur sín langsamlega best í Argentínu er Malbec, þar sem hún gefur af sér kröftug og bragðmikil vín.  Víngerð í Argentínu hefur fleygt mjög mikið fram undanfarinn áratug og nú eru ein öruggustu kaupin í vínbúðunum einmitt malbec frá Argentínu – t.d. Alamos, Catena Zapata, Dona Paula Estate og Trivento Golden Reserve (það koma upp 25 tegundir þegar flett er upp á heimasíðu Vínbúðanna), að ógleymdum toppvínum á við borð við Achaval Ferrer Quimera og svo víni dagsins – Catena Alta.  Þetta vín er flaggskipið frá víngerð Nicholas Catena og fjölskyldu hans í Mendoza, og í það fara aðeins þrúgur af bestu vínviðum Catena.  Vínin eru 18 mánuði á tunnum úr franskri eik áður en þau fara svo á flöskur.  Þau eru tilbúin til neyslu eftir 2-3 ár en hafa líka gott af því að fá að liggja og þroskast í nokkur ár.
Catena Alta Malbec 2013 er dökkrúbínrautt, unglegt. Fallegir taumar.  Í munni finnur maður sólber, fjólur, tóbak, pipar, leður og vanillu.  Í munni eru mikil tannín og góð sýra, en vínið er samt mjúkt, eftirbragðið frábært með súkkulaði og berjum en mætti vera aðeins lengra. Frábært vín. (4.498kr)