Dona Paula Los Cardos Sauvignon Blanc 2015

Þau eru ekki mörg, argentínsku hvítvínin sem gerð eru úr Sauvignon Blanc – a.m.k. ekki ef marka má úrvalið í hillum Vínbúðanna, og eins þegar flett er upp í víndómasafni Wine Spectator (þar eru alls 141 víndómur um argentínskan Sauvignon Blanc).  Á þessu sviði, líkt og flestum öðrum í argentískri víngerð, hafa framfarirnar verið miklar á undanförnum árum og meðaleinkunn þessara vína fer hækkandi.  Flest koma þessi vín frá Mendoza eða Uco-dalnum og eru yfirleitt í ódýrari kantinum – bæði vínin í Vínbúðunum kosta minna en 2.000 krónur
Dona Paula Los Cardos Sauvignon Blanc 2015 kemur frá Mendoza-héraði og er strágult á lit.  Í nefið koma hin dæmigerðu einkenni sauvignon blanc – sítrus, sólberjalauf (kattahland) og perur, ásamt ögn af ananas.  Í munni er vínið þurrt, aðeins súrt, með ágæta fyllingu og þokkalegt eftirbragð með perum og suðrænum ávöxtum.  Ágæt kaup (1.950kr). Hentar vel með fiski og salati, jafnvel skelfiski.